Mae "Seiniau Gwyllt Cymru" yn brosiect newydd sy'n cyfuno cerddoriaeth gerddorfaol, synau natur, a thechnoleg rhith-realiti. Wedi’i ddatblygu gan y cyfansoddwr Owain Llwyd, nod y prosiect yw creu profiad trochi o dirweddau Cymru trwy gerddoriaeth, sain a thechnoleg.

Daeth y syniad ar gyfer y prosiect i'r amlwg yn ystod 2021 pan oedd Owain yn cyfansoddi "Y Gogarth," darn cerddorfaol 15 munud ar gyfer Cerddorfa’r WNO yn dathlu tirwedd Y Gogarth yn Llandudno. Tua'r amser hwn, dechreuodd Owain archwilio datblygiad rhith-realiti fel artist. Sylweddolodd y gellid defnyddio VR i gludo cynulleidfaoedd i'r tirweddau sy'n ysbrydoli ei gerddoriaeth.

Yn 2022, mynychodd Owain ŵyl ‘Wildscreen’ ym Mryste, lle gwnaeth ddau gysylltiad pwysig. Cyfarfu â Jacinth Latta, cynhyrchydd/cyfarwyddwr a oedd wedi gweithio ar ymddangosiad David Attenborough i Ŵyl Glastonbury yn 2019. Roedd profiad Jacinth o ddefnyddio seiniau natur mewn digwyddiadau mawr yn cyd-fynd yn dda â syniadau Owain. Yn yr un ŵyl, cyfarfu Owain hefyd ag Axel Drioli, recordydd sain oedd yn cynllunio ei daith ‘Sounding Wild’ i gofnodi ymfudiad adar o Ogledd Ewrop i Orllewin Affrica.

Arweiniodd y cyfarfyddiadau hyn, ynghyd â thrafodaethau cychwynnol gydag Opera Cenedlaethol Cymru, at y cysyniad o "Seiniau Gwyllt Cymru". Nod y prosiect yw creu profiad sy'n mynd y tu hwnt i neuaddau cyngerdd traddodiadol, gan ddefnyddio VR i ddod â thirweddau Cymreig, synau naturiol a cherddoriaeth gerddorfaol i gynulleidfaoedd mewn ffordd newydd.

Mae "Seiniau Gwyllt Cymru" bellach yn ymdrech gydweithredol sy'n cynnwys partneriaethau newydd a chydweithrediadau hirsefydlog o brosiectau blaenorol Owain. Y nod yw creu clymblaid o sefydliadau gyda gweledigaeth gyffredin ar gyfer cyfuno cerddoriaeth, natur a thechnoleg mewn ffyrdd arloesol.

Mae’r prosiect peilot yn gweithredu fel carreg gamu ar gyfer profiad VR 15 munud, a fydd yn arddangos pum cynefin naturiol ledled Cymru. Ein nod yw ysbrydoli gobaith yn wyneb pryder hinsawdd trwy gysylltu pobl â rhyfeddodau byd natur, yma yng Nghymru.

Rydym wedi ymrwymo i wneud y profiad hwn mor hygyrch â phosibl, gan estyn allan i gymunedau nad ydynt yn cael eu gwasanaethu’n ddigonol a’r rhai nad oes ganddynt, efallai, fynediad hawdd i leoliadau celfyddydol traddodiadol neu fannau naturiol.

Bydd y daith fach ar gyfer y peilot yn ymweld â chartref gofal, mannau cymunedol, gwyliau a lleoliadau clinigol.

Mae’r prosiect hwn yn bosibl trwy bartneriaeth nifer o sefydliadau cenedlaethol, gan gynnwys:

WNO, Cadw, Tirweddau Cenedlaethol, Ymddiriedolaeth Genedlaethol, Sounding Wild, Rescape Innovation, Disability Arts Cymru, Canolfan Mileniwm Cymru, AM, Parc Cenedlaethol Eryri, Ymddiriedolaeth Natur De a Gorllewin Cymru, Cartref Gofal Bryn Seiont Newydd, Urdd Gobaith Cymru, Eisteddfod Gerddorol Ryngwladol Llangollen, Eisteddfod Genedlaethol, Prifysgol Bangor a Ty Cerdd.

Rydym yn cydnabod yn ddiolchgar gefnogaeth Cyngor Celfyddydau Cymru, PRS Foundation, Arts & Business Cymru Culture Step, Cadw, y Gymdeithas Tirweddau Genedlaethol a’r Ymddiriedolaeth Genedlaethol.

Ymunwch â ni ar y daith ryfeddol hon drwy Seiniau Gwyllt Cymru, yma ar lwyfan AM.